RSS Feed
Twitter
2:53 AM
Unknown
ထားဝယ်သမိုင်းကို ဘယ်လိုချဉ်းကပ်လေ့လာ ရေးသားမလဲ
သမိုင်းနဲ့ပတ်သက်ရင် လူတိုင်းက သိတယ်လို့ထင်ထားပါတယ်။ လူတွေသင်ကြားလေ့လာတဲ့ ဘာသာရပ်များစွာ ထဲမှာ အငြင်းအခုံအဖြစ်ဆုံး ပညာရပ်ဖြစ်ပါတယ်။ ဒါကဘာကို ပြောလဲဆိုရင် လူတိုင်းစိတ်ဝင်စားလို့ရယ်၊ ကိုယ်တိုင်ပါဝင်ခွင့်ရလို့ရယ်၊ အလွယ်တကူ အချက်အလက်တွေအဆင်သင့်ရှိနေတာရယ်၊ သူပြောငါပြော အနီးအနားမှာ အမြဲလိုလို ကြားနေတွေ့နေရလို့ပါ။ လူ့သဘာဝအရ လူတိုင်းယူဆတတ်တယ်၊ ဂုဏ်ယူတတ် ပါတယ်။ ငါတို့လူမျိုးက ရှေးသိပ်ကျတယ်၊ သိပ်ယဉ်ကျေးတယ်၊ ကြီးကျယ်ခမ်းနားတယ် ဆိုတာမျိုးတွေပါ။ ဗမာ၊ရခိုင်၊မွန်၊ရှမ်းတွေသာမက ယိုးဒယား၊ ကမ္ဘောဒီးယား၊ တရုတ်၊ အိန္ဒိယ အားလုံးလိုလိုပါ။
ကိုယ်ပြောချင်တာပြောဖို့အတွက် ကျွန်တော်တို့အနေနဲ့ သက်သေရှာရပါတယ်။ အဓိက သက်သေ(၂)မျိုးရှိပါ တယ်။ သ၀တ္ထုက လို့ခေါ်တဲ့ ပစ္စည်းသက်သေနဲ့ပြောတယ်။ ကျောက်စာလိုမျိုးစာပေအထောက်အထားတွေ၊ ကျောက်၊ကြေး၊သံ၊မြေစတဲ့ ရုပ်ဝတ္ထုပစ္စည်းတွေ၊ အဆောက်အဦးဟောင်းတွေ၊ မြို့ရိုးတွေ၊ ကျုံးတွေစတာ တွေနဲ့ သက်သေပြပြောကြပါတယ်။ နောက်တစ်မျိုးက အ၀တ္ထုလို့ ခေါ်တယ်။ ပုံပြင်တွေ၊ ဒဏ္ဍာရီတွေ၊ ကဗျာတွေ၊ သီချင်းတွေ၊ ဘာသာစကားတွေ၊ ဓလေ့ထုံးတမ်းတွေပါတယ်။
သမိုင်းပညာရပ်မှာ အရေးကြီးတာက အကြောင်းအကျိုးဆက်ကိုရှင်းပြနိုင်ဖို့လိုပါတယ်။ သမိုင်းပြောရင် တုတ်ထမ်းပြောရတယ်လို့ဆိုပါတယ်။ နောက်ပိုင်းမှာတော့ သုတေသနတွေ၊ တူးဖော်မှုတွေလုပ်ပြီး ပြောလာပါ တယ်။ ပေါက်တူးထမ်းပြီးပြောကြလို့ဆိုပါတယ်။ ရာဇ၀င်ဆိုတာ ရာဇ၀ံသဆိုတဲ့ ရှေးမင်းတွေအကြောင်းကို အဓိကပြပါတယ်၊ ပြည်သူလူထုအကြောင်း အသေးစိတ်မသိရပါဘူး။ ဘာသာရေး၊ လူမှုရေး၊ စီးပွါးရေး၊ စစ်ရေး၊ နိုင်ငံခြားရေးတွေကို ဆက်စပ်ဖော်ထုတ်ရတယ်၊ ဒီလိုဖော်ထုတ်တဲ့အခါ အပြည့်အစုံသိဖို့ အလွန်တရာခက်ခဲ့ပါ တယ်။ လွန်ခဲ့တဲ့ နှစ်ပေါင်း ၅၀ / ၁၀၀ကိုတောင် ပြန်ဖော်ဖို့ခက်ပါတယ်၊ ၁၀၀၀/ ၂၀၀၀ဆိုရင် ပိုဆိုးပါတယ်။ အချက်အလက်တွေကို အစဉ်အဆက်လေ့လာစုစည်းခဲ့ပြီး နောက်လူတွေက ထပ်ထပ်ဖြည့်ရပါတယ်။ အချက်အ လက်တွေ စုစည်းဖို့လိုသလို ထပ်ဖြည့်ဖို့အတွက် သုတေသနတွေ၊ တူးဖော်မှုတွေလုပ်ရပါတယ်၊ ဒါမှ တဖြည်း ဖြည်းချင်း သမိုင်းဟာ ပေါ်လာပါတယ်။
သမိုင်းကို ချဉ်းကပ်လေ့လာတဲ့အခါ၊ တွေ့ရှိချက်တွေကို ပြန်ပြောတဲ့အခါ နည်းပညာတွေ၊ ပုံစံတွေမတူကြပါဘူး။ ဗမာ့သမိုင်းတွေအပါအ၀င် ကမ္ဘာပေါ်ရှိရှေးသမိုင်းတွေမှာ ဒဏ္ဍာရီဆန်တာတွေ၊ သဘာဝလွန်ဖြစ်ရပ်တွေ အများကြီးပါပါတယ်။ နတ်ဘုရားတွေ၊ နဂါးတွေ၊ ကျားတွေနဲ့ပေါင်းစပ်တဲ့အကြောင်းတွေပါမယ်။ ကြီးကျယ်ခမ်း နားတဲ့ အကြောင်းတွေ၊ ခေတ်လူတွေနားမလည်နိုင်တဲ့ စွမ်းရည်တွေ၊ တန်ခိုးတွေ၊ သရဲတွေတစ္ဆေတွေလည်းပါ တတ်ပါတယ်။ ရှေးခေတ်ကအသုံးပြုခဲ့တဲ့ နည်းပညာတွေ၊ အတတ်ပညာတွေပါတယ်။ နားလည်လက်ခံဖို့ခက်တဲ့ ကောင်းကင်ပျံယာဉ်တွေအကြောင်း၊ စက္ကောမအတတ်၊ အဂ္ဂိရတ်(ဖိုထိုးခြင်း)၊ စစ်ပွဲတွေအကြောင်းပါတယ်။ ဒါတွေကို မဟုတ်ဘူးလို့ လက်လွတ်စဖွယ်ငြင်းမရပါဘူး။ သမိုင်းဖြစ်ရပ်မှန်တွေပါပါတယ်။ ကျွန်တော်ဆရာတစ် ပါးက ပြောတယ်။ ဥစ္စာစောင့်ရှိတယ်လို့ပြောရင် လူနေခဲ့ဘူးတယ်လို့မှတ်တဲ့။ ဘာဖြစ်လို့လဲဆိုတော့ ဥစ္စာစောင့် က လူသေပြီးမှဖြစ်လို့တဲ့။ ဥစ္စစောင့်မဖြစ်ခင် နေသွားတဲ့လူတွေအကြောင်းလေ့လာလို့ရတယ်လို့ဆိုတယ်။
မြန်မာသမိုင်းတွေဖြစ်တဲ့ ဗမာသမိုင်း၊မွန်သမိုင်း၊ရခိုင်သမိုင်း၊ကရင်သမိုင်းစတာတွေလေ့လာတဲ့အခါ သတိပြု ရမယ့် အချက်လေးတွေရှိပါတယ်။ ရေးသားဖော်ပြတဲ့ သက္ကရာဇ်က (၃)မျိုးရှိပါတယ်၊ သာသနာနှစ်၊သကနှစ်၊ ကောဇာနှစ်တို့ဖြစ်ပါတယ်။ အများအားဖြင့် မြတ်စွာဘုရားရှင်ပွင့်တော်မူစဉ် ဘယ်နှစ်ဝါမြောက်လို့လည်း သုံးတတ်ပါတယ်။ ဗုဒ္ဓဘာသာတွေဖြစ်တော့ ယုံကြည်မြတ်နိုးတဲ့စိတ်နဲ့ရေးပါတယ်။ ပြီးတော့ တကောင်းခေတ်၊ သရေခေတ္တာခေတ်၊ ပုဂံခေတ်၊ ပင်းယခေတ်၊ အင်းဝခေတ်၊ စစ်ကိုင်းခေတ်၊ တောင်ငူခေတ်၊ ဟံသာဝတီခေတ်၊ အင်းဝခေတ်၊ ကုန်းဘောင်ခေတ် တွေသာမက ဓည၀တီခေတ်၊ ဝေသာလီခေတ်၊ ကျောင်စကားခေတ်၊ မြောက်ဦးခေတ်တွေအပြင်၊ သုဝဏ္ဏဘူမိခေတ်စတဲ့ ခေတ်အလိုက်ခွဲခြားရေးသားထားပါတယ်။ ရိုးရာအစဉ် အလာအရ ရေးမယ်ဆိုလည်း ၀မ်းသာစရာဖြစ်ပါတယ်။ သာသနာနှစ် ၆၀မှာ မဟာသမ္ဘ၀မင်းအစပြုလို့ ကုန်းဘောင်ခေတ်သီပေါမင်းအထိ မင်းဆက် ၁၃၆ပါးကြောင်းရှိကြောင်း၊ ဒီမင်းတွေရဲ့ရှေ့မှာ မင်း ၁၃၉၃ပါးရှိ သေးကြောင်းတွေဆိုပါတယ်။ တရုတ်တို့၊ အိန္ဒိယတို့မှာ လွန်ခဲ့တဲ့နှစ်ပေါင်း ( ၅၀၀၀ - ဘီစီ၃၀၀၀)လောက် ကတည်းက မင်းဆက်တွေရှိနေပါပြီ။
အင်္ဂလိပ်တွေမြန်မာနိုင်ငံကို သိမ်းပြီးတော့ ဘာသာရေးကျောင်းတွေမှာ သူတို့ပညာရေးစနစ်ကို စတင်ဖြန့်ပါ တယ်။ ဒီလိုနဲ့ ကမ္ဘာအနှံ့မှာ အင်္ဂလိပ်စနစ်အပါအ၀င်ဖြစ်တဲ့ အနောက်တိုင်းပညာရေးစနစ် ပြန့်ပွါးလာပါတယ်။ မြန်မာသမိုင်းတွေကို အင်္ဂလိပ်စနစ်အတိုင်းရေးခဲ့ကြတယ်။ ငြင်းခုံခဲ့ကြတယ်။ သမိုင်းကို လေ့လာတဲ့နေရာမှာ အနောက်တိုင်းသားတွေရဲ့သတ်မှတ်ချက်အရ ခေတ်တွေကိုဒီလိုခွဲခြားပါတယ်။ အကြိုသမိုင်းနဲ့ သမိုင်းဆိုပြီးခွဲ တယ်။ စာပေအထောက်အထားတွေ့မှ သမိုင်းလို့သတ်မှတ်တယ်လို့ဆိုပါတယ်။ အကြိုသမိုင်းမှာလည်း ပွဲဦးထွက်သမိုင်း၊ အဝေးသမိုင်း၊ အယောင်သမိုင်းနဲ့အစသမိုင်းလို့ခွဲပြန်တယ်၊ ပြီးကျောက်ခေတ်၊ ကြေးခေတ်၊ သံခေတ်ဆိုတာလည်းရှိတယ်၊ ဒီကျောက်ခေတ်ကိုဘဲ မုဆိုးတံငါခေတ်လို့ဆိုပြန်တယ်၊ ကျောက်ခေတ်မှာလဲ ကျောက်ခေတ်ဟောင်း၊ ကျောက်ခေတ်လယ်နဲ့ ကျောင်ခေတ်သစ်ဆိုပြီးခွဲပါတယ်။
မြန်မာနိုင်ငံမှာ လွန်ခဲ့တဲ့ နှစ်သန်းပေါင်း ၄၀က ပရိုင်းမိတ်ရှိပါတယ်၊ အညာသား၊ နွယ်ခွေလူလို့ခေါ်တဲ့လူသား တွေ လွန်ခဲ့တဲ့ နှစ်ပေါင်း ၄၀၀၀၀၀ကစပြီးနေခဲ့ပါတယ်၊ နှစ်ပေါင်း ၁၀၀၀၀လောက်မှာ ပြဒလင်းဂူရှိပါတယ်၊ ကျောက်ခေတ်ဟောင်းလက်နက်တွေ၊ ကျောက်ခေတ်လယ်နဲ့ကျောက်ခေတ်သစ်လက်နက်တွေကို မြန်မာနိုင်ငံ အနှံတွေ့ရပါတယ်။ တောင်သမန်အင်းလိုနေရာတွေမှာ ကြေးခေတ်တွေ့ရတယ်။ တကောင်းမှာ သံခေတ် အထောက်အထားတွေတွေ့ရပါတယ်။
ကျွန်တော်တို့ ထားဝယ်သမိုင်းကို ရေးတဲ့အခါ ကိုယ်ကြိုက်ရာပုံစံနဲ့ ချဉ်းကပ်လေ့လာရေးသားနိုင်ပါတယ်။ မြန်မာသမိုင်းရေးပုံအရ မြတ်စွာဘုရားမပွင့်ခင်၊ ပွင့်တော်မူစဉ်၊ သာသနာနှစ်စသည်ဖြင့်ပေါ့လေ။ ပြီးတော့ ပျူခေတ်ထားဝယ်၊ ပုဂံခေတ်ထားဝယ်လိုမျိုး ခေတ်တွေခွဲပြီးရေးမလားပေါ့။ ဒါမှမဟုတ် အနောက်တိုင်းနည်းလို ကျောက်ခေတ်၊ကြေးခတ်၊ သံခေတ်ဆိုတာမျိုးတွေရေးမလားပေါ့၊ နောက်တနည်းကတော့ သာဂရခေတ်၊ ဝေဒီခေတ်၊ မုတ္တီးခေတ်၊ ဆင်ဆိပ်ခေတ်ဆိုပြီးရေးမလားပေါ့။ ကျွန်တော်တို့ဘောင်လေးတွေချပြီး အစာဖြည့် ထည့်သွားရင် တစ်ချိန်မှာ သမိုင်းရုပ်လုံးပေါ်လာမှာပါ။
ဆရာဇော် (စိတ်ပညာ) ရဲ့ facebook timeline မှ ကူးယူဖော်ပြပါသည်။
Posted in 
0 comments:
Post a Comment